Tǝlxutbat ǝn Yaxya

Tǝsǝntit n ǝššǝɣǝl ǝn Yaxya

1Awatay wa n maraw ǝd sǝmmos ǝn Qaysara Tabirǝyas da taɣmar, Fons Bilatǝs a imosan ǝmuzar n akal wa n Yahudǝyya, amaran Herod ixkâm fǝl akal wa n Galilaya, amaqqar-net Filibus ixkâm fǝl wa n Iturayya ǝd wa n Tǝrakonit, Lisanǝya ǝnta ixkâm fǝl akal wa n Abila. 2Xânan ǝd Kayif ǝntanay ǝmosan ilimaman win zawwarnen. Awatay wen da a d-izzǝbbat awal ǝn Mǝššina fǝl Yaxya ag Zakarayya daɣ ǝsuf. 3Dǝffǝr awen illil Yaxya ikallan kul win ahanen attayan n agarew wa n Yordan, itaggu y aytedan tǝlxutbat, igann-asan ad tǝwǝsǝlmǝɣan daɣ aman imos awen arat issiknan tǝtubt-nasan, fǝl ad ǝgrǝwan tǝsureft ǝn bakkadan-nasan.

4Ǝmmǝk ǝddi was tǝnda batu ta iktab Ǝnnǝbi Isayas, as inna: «Alǝs iyyan idkâl ǝmǝsli-net daɣ ǝsuf igannu: Sǝmmutǝgat abaraqqa y Ǝmǝli! Tǝsǝssiɣǝdam tarrayen dat-ǝs!

5Id t-illa ǝnahoɣ ketnet ad inbǝl. Idɣaɣan ǝd gefan ad ǝrǝsan, tarrayen šin ǝfraɣnen ad aɣǝdnat, ibaraqqan win wǝr nogda ad agdin

6Inǝy awedan ketnet ǝlɣillas wa d-izazzabbat Mǝššina.»

Tǝlxutbat ǝn Yaxya

7Adi a fǝl igannu Yaxya i tǝmattiwen šin t-idu-tasinen y a tanat-issǝlmǝɣ daɣ aman: «Xa taššolen šin! Ma kawan-issosanan ǝdǝrrǝg y attadib ǝn Mǝššina wa d-izayan. 8Daɣ adi taggiwat imazalan olaɣnen tǝsǝttǝddim sǝr-san tǝtubt-nawan! Wǝr igda ad tǝgannim daɣ man-nawan: Nakkanay ǝzzurrǝyya n ǝnnǝbi Ibrahim a nǝmos, fǝlas silakanaɣ-awan as Mǝššina ifrâg ad isǝmmǝttǝy šihun šin tǝhannayam da, ixlǝk-du daɣ-asnat ǝzzurrǝyya y Ibrahim! 9Agat ǝnnǝyat! Tazǝft harwa ǝmǝrǝdda da tǝmmotag y a du-tǝsǝddǝngǝr y eškan. Daɣ adi ašǝk kul wa wǝr nǝtirǝw aratan olaɣnen ad itǝwǝɣtǝs, itǝwǝgǝr-in daɣ tǝmsay.»

Ǝmmǝk was za nagu alxal wa imal Yaxya

10A tu-sastanan aytedan, gannin-as: «Daɣ adi mas danaɣ-iwar a tu-nagu?» 11Inn-asan: «Awedan wa ilan ǝššin sǝlsa, akf-et iyyan i wa tu-wǝr-nǝla; wa ilan a itša, akfet daɣ-as wa tu-wǝr-nǝla.»

12Inabazan n amana ǝntanay da, tasin-du Yaxya fǝl a tan-issǝlmǝɣ daɣ aman, ǝnnan-as: «Ǝššex, mas danaɣ-iwar a tu-nagu?» 13Inn-asan: «Ad wǝr tǝzzǝrzǝmam a ogaran awa dawan-itawannan.»

14Ǝssǝstanan-tu deɣ sojitan, ǝnnan-as: «Nakkanay za, mas danaɣ-iwar a tu-nagu?» Inn-asan: «Ad wǝr tǝrkǝbam daɣ awedan waliyyan azrǝf-net, wala deɣ tǝssǝwǝram-tu bahu. Agdat s alxaq-nawan.»

Assa n Ǝlmǝsix

15Aytedan kul win ǝslanen y awa igannu Yaxya, ǝgân attama; akk awedan isamadranan daɣ ǝwǝl-net kud Yaxya en da a imosan Ǝlmǝsix wala. 16Awen da fǝl dasan-inna Yaxya ketnasan: «Nak, aman a daq qawan-salmaɣa, mišan izay-du alǝs s awa di-iga daɣ šigrat, wǝr eweda wala arra ǝn suɣan ǝn ɣateman-net. Ǝnta Infas Wa Zǝddigan ǝd tǝmsay a daq qawan-z-issǝlmǝɣ. 17Iha ǝlmital n awedan ittâfan tesayt y ad izzǝzǝr alkama-net. Išadaw alkama daɣ tadangawt-net, šiɣal amaran ag-enat daɣ tǝmsay tǝbilaglagat faw.»

Iguz ǝn Yaxya kasaw

18Igla Yaxya daɣ amel n Ǝlinjil, itaggu y aytedan ǝnnǝsixatan wiyyad aggotnen.

19Herod amaran wa n ǝmǝnokal n akal ǝn Galilaya ǝruɣmatan a das-iga daɣ batu ǝn Herodǝyas tǝmosat taɣur amadray ǝn Herod en da igân esǝm Filibus, ig-âs deɣ wiyyad ǝruɣmatan fǝl arak mazalan labasnen kul win hadatnen iga. 20Iššota Herod fǝl arak mazalan win den kul igi ǝn Yaxya daɣ kasaw.

Ǝtǝwǝsǝlmaɣ ǝn Ɣaysa daɣ aman

21As tawasalmaɣan aytedan kul daɣ aman, itawasalmaɣ daɣ-san Ɣaysa ǝnta da. Itattar alwaq wen da as ǝnnolaman jǝnnawan, 22izzǝbbat-du fall-as Infas wa Zǝddigan iha šaššelan ǝn tǝdabert, igmad-du ǝmǝsli ijǝnnawan, inna:

«Kay a imosan Barar-in ǝkneɣ tara,

tǝssinda-du agna-nin.»

Aljad ǝn Ɣaysa Ǝlmǝsix

23Ila Ɣaysa edag ǝn karadat tǝmǝrwen n awatay as issǝnta ǝššǝɣǝl-net.

Ǝttâfan aytedan as ag Yusǝf wa n ag Heli.

24Heli ǝnta ag Mâtat, Mâtat ag Lebi,

Lebi ag Malki, Malki ag Yannay, Yannay ag Yusǝf,

25Yusǝf ag Matasiyas, Matasiyas ag Amos,

Amos ag Nahum, Nahum ag Xasli, Xasli ag Naggay.

26Naggay ag Matti, Matti ag Matasiyas,

Matasiyas ag Samɣi, Samɣi ag Yosax, Yosax ag Yoda,

27Yoda ag Yohanan, Yohanan ag Ɣaysa,

Ɣaysa ag Zǝrubabil, Zǝrubabil ag Assalat, Assalat ag Nayri,

28Nayri ag Malxi, Malxi ag Addi, Addi ag Kosam,

Kosam ag Almadama, Almadama ag Er,

29Er ag Ɣaysa, Ɣaysa ag Alyazar, Alyazar ag Yorim,

Yorim ag Mâtat, Mâtat ag Lebi,

30Lebi ag Simɣon, Simɣon ag Yahuda,

Yahuda ag Yusǝf, Yusǝf ag Yunam, Yunam ag Ilyakim,

31Ilyakim ag Malaya, Malaya ag Mayna,

Mayna ag Mâtat, Mâtat ag Natan, Natan ag Dawǝd,

32Dawǝd ag Yasay, Yasay ag Ɣubayd,

Ɣubayd ag Boxaz, Boxaz ag Sala, Sala ag Nasun,

33Nasun ag Ɣaminadab, Ɣaminadab ag Admin,

Admin ag Arni, Arni ag Xasrun, Xasrun ag Farǝs, Farǝs ag Yahuda,

34Yahuda ag Yaqub, Yaqub ag Isǝhaq,

Isǝhaq ag Ibrahim, Ibrahim ag Terax, Terax ag Naxur,

35Naxur ag Sarux, Sarux ag Raggaw,

Raggaw ag Falax, Falax ag Ɣabbir, Ɣabbir ag Salax,

36Salax ag Kaynam, Kaynam ag Arfakšad,

Arfakšad ag Sam, Sam ag Nux, Nux ag Lamax,

37Lamax ag Matusala, Matusala ag Henox,

Henox ag Yarit, Yarit ag Malelyal, Malelyal ag Kaynam,

38Kaynam ag Enus, Enus ag Set, Set ag Adǝm,

Adǝm ǝnta Mǝššina t-id-ixlakan.