שמלב23

ב כגא וְאֵלֶּה דִּבְרֵי דָוִד הָאַחֲרֹנִים: נְאֻם דָּוִד בֶּן-יִשַׁי וּנְאֻם הַגֶּבֶר הֻקַם עָלמְשִׁיחַ אֱלֹהֵי יַעֲקֹב וּנְעִים זְמִרוֹת יִשְׂרָאֵל. ב כגב רוּחַ יְהוָה דִּבֶּר-בִּי וּמִלָּתוֹ עַל-לְשׁוֹנִי. ב כגג אָמַר אֱלֹהֵי יִשְׂרָאֵל לִי דִבֶּר צוּר יִשְׂרָאֵל: מוֹשֵׁל בָּאָדָםצַדִּיק מוֹשֵׁל יִרְאַת אֱלֹהִים. ב כגד וּכְאוֹר בֹּקֶר יִזְרַח-שָׁמֶשׁ בֹּקֶר לֹא עָבוֹת מִנֹּגַהּ מִמָּטָר דֶּשֶׁא מֵאָרֶץ. ב כגה כִּי-לֹא-כֵן בֵּיתִי עִם-אֵל: כִּי בְרִית עוֹלָם שָׂם לִי עֲרוּכָה בַכֹּל וּשְׁמֻרָהכִּי-כָל-יִשְׁעִי וְכָל-חֵפֶץ כִּי-לֹא יַצְמִיחַ. ב כגו וּבְלִיַּעַל כְּקוֹץ מֻנָד כֻּלָּהַם: כִּי-לֹא בְיָד יִקָּחוּ. ב כגז וְאִישׁ יִגַּע בָּהֶם יִמָּלֵא בַרְזֶל וְעֵץ חֲנִית וּבָאֵשׁ שָׂרוֹף יִשָּׂרְפוּ בַּשָּׁבֶת.

ב כגח אֵלֶּה שְׁמוֹת הַגִּבֹּרִים אֲשֶׁר לְדָוִד: יֹשֵׁב בַּשֶּׁבֶת תַּחְכְּמֹנִי רֹאשׁ הַשָּׁלִשִׁי הוּא עֲדִינוֹ העצנו (הָעֶצְנִי)עַל-שְׁמֹנֶה מֵאוֹת חָלָל בְּפַעַם אחד (אֶחָת).

ב כגט וְאַחֲרָו אֶלְעָזָר בֶּן-דדי (דֹּדוֹ) בֶּן-אֲחֹחִי בִּשְׁלֹשָׁה גברים (הַגִּבֹּרִים) עִם-דָּוִד בְּחָרְפָם בַּפְּלִשְׁתִּים נֶאֶסְפוּ-שָׁם לַמִּלְחָמָה וַיַּעֲלוּ אִישׁ יִשְׂרָאֵל. ב כגי הוּא קָם וַיַּךְ בַּפְּלִשְׁתִּים עַד כִּי-יָגְעָה יָדוֹ וַתִּדְבַּק יָדוֹ אֶל-הַחֶרֶב וַיַּעַשׂ יְהוָה תְּשׁוּעָה גְדוֹלָה בַּיּוֹם הַהוּא וְהָעָם יָשֻׁבוּ אַחֲרָיו אַךְ-לְפַשֵּׁט.

ב כגיא וְאַחֲרָיו שַׁמָּה בֶן-אָגֵא הָרָרִי וַיֵּאָסְפוּ פְלִשְׁתִּים לַחַיָּה וַתְּהִי-שָׁם חֶלְקַת הַשָּׂדֶה מְלֵאָה עֲדָשִׁים וְהָעָם נָס מִפְּנֵי פְלִשְׁתִּים. ב כגיב וַיִּתְיַצֵּב בְּתוֹךְ-הַחֶלְקָה וַיַּצִּילֶהָ וַיַּךְ אֶת-פְּלִשְׁתִּים וַיַּעַשׂ יְהוָה תְּשׁוּעָה גְדוֹלָה.

ב כגיג וַיֵּרְדוּ שלשים (שְׁלֹשָׁה) מֵהַשְּׁלֹשִׁים רֹאשׁ וַיָּבֹאוּ אֶל-קָצִיר אֶל-דָּוִדאֶל-מְעָרַת עֲדֻלָּם וְחַיַּת פְּלִשְׁתִּים חֹנָה בְּעֵמֶק רְפָאִים. ב כגיד וְדָוִד אָז בַּמְּצוּדָה וּמַצַּב פְּלִשְׁתִּים אָז בֵּית לָחֶם. ב כגטו וַיִּתְאַוֶּה דָוִד וַיֹּאמַר: מִי יַשְׁקֵנִי מַיִם מִבֹּאר בֵּית-לֶחֶם אֲשֶׁר בַּשָּׁעַר.

ב כגטז וַיִּבְקְעוּ שְׁלֹשֶׁת הַגִּבֹּרִים בְּמַחֲנֵה פְלִשְׁתִּים וַיִּשְׁאֲבוּ-מַיִם מִבֹּאר בֵּית-לֶחֶם אֲשֶׁר בַּשַּׁעַר וַיִּשְׂאוּ וַיָּבִאוּ אֶל-דָּוִד וְלֹא אָבָה לִשְׁתּוֹתָם וַיַּסֵּךְ אֹתָם לַיהוָה. ב כגיז וַיֹּאמֶר חָלִילָה לִּי יְהוָה מֵעֲשֹׂתִי זֹאת הֲדַם הָאֲנָשִׁים הַהֹלְכִים בְּנַפְשׁוֹתָם וְלֹא אָבָה לִשְׁתּוֹתָם אֵלֶּה עָשׂוּ שְׁלֹשֶׁת הַגִּבֹּרִים.

ב כגיח וַאֲבִישַׁי אֲחִי יוֹאָב בֶּן-צְרוּיָה הוּא רֹאשׁ השלשי (הַשְּׁלֹשָׁה) וְהוּא עוֹרֵר אֶת-חֲנִיתוֹ עַל-שְׁלֹשׁ מֵאוֹת חָלָל וְלוֹ-שֵׁם בַּשְּׁלֹשָׁה. ב כגיט מִן-הַשְּׁלֹשָׁה הֲכִי נִכְבָּד וַיְהִי לָהֶם לְשָׂר וְעַד-הַשְּׁלֹשָׁה לֹא-בָא.

ב כגכ וּבְנָיָהוּ בֶן-יְהוֹיָדָע בֶּן-אִישׁ-חי (חַיִל) רַב-פְּעָלִים מִקַּבְצְאֵל הוּא הִכָּה אֵת שְׁנֵי אֲרִאֵל מוֹאָב וְהוּא יָרַד וְהִכָּה אֶת-האריה (הָאֲרִי) בְּתוֹךְ הַבֹּאר בְּיוֹם הַשָּׁלֶג. ב כגכא וְהוּא-הִכָּה אֶת-אִישׁ מִצְרִי אשר (אִישׁ) מַרְאֶה וּבְיַד הַמִּצְרִי חֲנִית וַיֵּרֶד אֵלָיו בַּשָּׁבֶט וַיִּגְזֹל אֶת-הַחֲנִית מִיַּד הַמִּצְרִי וַיַּהַרְגֵהוּ בַּחֲנִיתוֹ. ב כגכב אֵלֶּה עָשָׂה בְּנָיָהוּ בֶּן-יְהוֹיָדָע וְלוֹ-שֵׁם בִּשְׁלֹשָׁה הַגִּבֹּרִים. ב כגכג מִן-הַשְּׁלֹשִׁים נִכְבָּד וְאֶל-הַשְּׁלֹשָׁה לֹא-בָא וַיְשִׂמֵהוּ דָוִד אֶל-מִשְׁמַעְתּוֹ. ב כגכד עֲשָׂהאֵל אֲחִי-יוֹאָב בַּשְּׁלֹשִׁים אֶלְחָנָן בֶּן-דֹּדוֹ בֵּית לָחֶם. ב כגכה שַׁמָּה הַחֲרֹדִי אֱלִיקָא הַחֲרֹדִי. ב כגכו חֶלֶץ הַפַּלְטִי עִירָא בֶן-עִקֵּשׁ הַתְּקוֹעִי. ב כגכז אֲבִיעֶזֶר הָעַנְּתֹתִי מְבֻנַּי הַחֻשָׁתִי. ב כגכח צַלְמוֹן הָאֲחֹחִי מַהְרַי הַנְּטֹפָתִי. ב כגכט חֵלֶב בֶּן-בַּעֲנָה הַנְּטֹפָתִי אִתַּי בֶּן-רִיבַי מִגִּבְעַת בְּנֵי בִנְיָמִן. ב כגל בְּנָיָהוּ פִּרְעָתֹנִי הִדַּי מִנַּחֲלֵי גָעַשׁ. ב כגלא אֲבִי-עַלְבוֹן הָעַרְבָתִי עַזְמָוֶת הַבַּרְחֻמִי. ב כגלב אֶלְיַחְבָּא הַשַּׁעַלְבֹנִי בְּנֵי יָשֵׁן יְהוֹנָתָן. ב כגלג שַׁמָּה הַהֲרָרִי אֲחִיאָם בֶּן-שָׁרָר הָארָרִי. ב כגלד אֱלִיפֶלֶט בֶּן-אֲחַסְבַּי בֶּן-הַמַּעֲכָתִי אֱלִיעָם בֶּן-אֲחִיתֹפֶל הַגִּלֹנִי. ב כגלה חצרו (חֶצְרַי) הַכַּרְמְלִי פַּעֲרַי הָאַרְבִּי. ב כגלו יִגְאָל בֶּן-נָתָן מִצֹּבָה בָּנִי הַגָּדִי. ב כגלז צֶלֶק הָעַמֹּנִי נַחְרַי הַבְּאֵרֹתִינשאי (נֹשֵׂא) כְּלֵי יוֹאָב בֶּן-צְרֻיָה. ב כגלח עִירָא הַיִּתְרִי גָּרֵב הַיִּתְרִי. ב כגלט אוּרִיָּה הַחִתִּיכֹּל שְׁלֹשִׁים וְשִׁבְעָה.