Psalm 10 Aleppo Codex 1א למה יהוה תעמד ברחוק תעלים לעתות בצרה 2ב בגאות רשע ידלק עני יתפשו במזמות זו חשבו 3ג כי-הלל רשע על-תאות נפשו ובצע ברך נאץ יהוה 4ד רשע--כגבה אפו בל-ידרש אין אלהים כל-מזמותיו 5ה יחילו דרכו בכל-עת--מרום משפטיך מנגדו כל-צורריו יפיח בהם 6ו אמר בלבו בל-אמוט לדר ודר אשר לא-ברע 7ז אלה פיהו מלא--ומרמות ותך תחת לשונו עמל ואון 8ח ישב במארב חצרים--במסתרים יהרג נקי עיניו לחלכה יצפנו 9ט יארב במסתר כאריה בסכה-- יארב לחטוף עני יחטף עני במשכו ברשתו 10י ודכה (ידכה) ישח ונפל בעצומיו חלכאים (חל כאים) 11יא אמר בלבו שכח אל הסתיר פניו בל-ראה לנצח 12יב קומה יהוה--אל נשא ידך אל-תשכח עניים (ענוים) 13יג על-מה נאץ רשע אלהים אמר בלבו לא תדרש 14יד ראתה כי-אתה עמל וכעס תביט-- לתת בידך עליך יעזב חלכה יתום אתה היית עוזר 15טו שבר זרוע רשע ורע תדרוש-רשעו בל-תמצא 16טז יהוה מלך עולם ועד אבדו גוים מארצו 17יז תאות ענוים שמעת יהוה תכין לבם תקשיב אזנך 18יח לשפט יתום ודך בל-יוסיף עוד--לערץ אנוש מן-הארץ The Aleppo Codex without Vowel Points or Punctuation Based on the electronic edition at mechon-mamre.org. For comparative study, where possible, chapter and verse numbers on Biblos.com sites are mapped to the traditional convention used by the KJV, NASB, NIV and others. |
    |